#करोनाच्या नजरकैदेत...भाग ६

करोनाच्या नजरकैदेत...भाग ६

आज जे बोलू ते इंग्रजीतूनच असंं आमचंं एक व्रत होतंं.

'उठता-बसता, खाता-पिता केवळ इंग्रजीतूनच बोलायचं. गरज लागेल तिथंं गुगल ट्रान्सलेटर वापरायचं. पण इंग्रजीला सोडायचंं नाही...' मुलांना मी व्रत समजावून सांगत होतो. 

घरच्यांची मदत व गुगल ट्रान्सलेटर सोबतीला होते. 

पण तरी सफाईदार इंग्रजी बोलणारा, मुलांच्या शंकांना विनाविलंब उत्तरंं देणारा, चुटकीसरशी मराठी वाक्यंं इंग्रजीत भाषांतरित करणारा एक जिताजागता माणूस गटावर हवा असंं खूप वाटत होतंं.

सहावीसाठी नाव सापडलंं होतंं. 

आमचे पालक श्री मिलिंदराव धारवाडकर. 

नुकतीच काही महिन्यांची परदेशवारी करून आले होते. 

सध्या वर्क फ्रॉम होम चालू असल्यानंं त्यांनाही वेळ होता.
मग त्यांच्यावर सहावीची जबाबदारी दिली.

सातवीसाठी मात्र व्यक्तीच्या शोधात होतो.

.....................

लॉकडाऊनचे फायदेही काही कमी नाहीत. 

त्यातीलच एक म्हणजे जुन्या मित्रमैत्रिणींशी पुन्हा संपर्क स्थापित होणंं. 

या प्रकारातील माझ्या यादीतील एक नाव म्हणजे स्फूर्ती शेणाॅय. 

नेहमीप्रमाणे थोडा पात्रपरिचय -

माझ्याच बॅचची. पण इंग्रजी माध्यमातील. अग्रणी योजनेमुळे ओळख झाली, नंतर मैत्री झाली. अत्यंत हुशार. तितकीच सालस. प्राचार्या सुमनताई शेणाॅय यांची मुलगी ही ओळख मागे टाकून आता बडोद्यातील एक अत्यंत नामवंत डॉक्टर अशी नवी ओळख प्रस्थापित केलीली स्फूर्ती. फ़िजिओथेरपीची बॅचलर. शिवाय NDT- न्युरो डेव्हलपमेंट थेरपी शिकलेली. दिव्यांग मुलांसाठी जीव ओतून काम करणारी. सकाळी साडेसात वाजता हीचं क्लिनिक उघडतं. (सध्या ही वेळ तर माझी उठण्याचीही वेळ राहिलेली नाहीये. असो.)त्यामुळे अर्थातच खूप बिझी शेड्युल. पण सध्या वेळ आहे. याकाळात तिच्याशी झालेल्या गप्पांतून आणखी एक माहिती मला समजली होती. तिच्या १३ वर्षीय मुलाचं एक इंग्रजी पुस्तक प्रकाशित होऊ घातलंय म्हणे. 

माझा व्यक्तीचा शोध संपला होता तर...

...................

"स्फूर्ती ...अशी एक कल्पना डोक्यात आहे. एक दिवस येशील का आमच्या वर्गाच्या ग्रुपवर? दिवस अख्खा काढावा लागेल पण. जमेल का?"

"हो. का नाही? आवडेल उलट."

(नकार न मिळण्याचंं बहुतेक 'वरदान' घेऊनच आलोय मी. सध्या रोज दोन तास महाभारत पाहण्याचे परिणाम...)

दिवस उजाडला. 

सहावीवर मिलिंदरावांची तर सातवीवर स्फूर्तीची ओळख करून दिली. 

मुलं लाजून शंका विचारणार नाहीत. 

इंग्रजी वाक्यंं करणार नाहीत. 
असंं वाटून पाच सहा जणांना वैयक्तिक msg करून ग्रुपवर ॲक्टिव राहा अशा सूचना दिल्या.

शब्द खाली पाडतील ती माझी पोरंं कसली.

ग्रुपवर मराठी, इंग्रजी वाक्यांचा अक्षरश: सुळसुळाट सुरू झाला.

प्रत्येकाला, अगदी प्रत्येकाला प्रतिसाद देत होते दोघेही. 
सहावीपेक्षा सातवीचा ग्रुप भरून वाहत होता. 

स्फूर्तीची दमछाक होत आहे हे समजत होतंं.

पण ती त्याचा आनंद घेत होती.

'They are superb. They are too fast. I am lagging behind. But I shall answer all...'

बहुतेक स्फूर्ती तिचंं स्वगत मला वैयक्तिक msg करून सांगत होती.

मुलांची भीड आता चेपली होती. 

त्यामुळे वाक्यांची संख्या व वेग हे दोन्ही वाढले होते. 
काही जणांनी निरागसपणे ताईची परीक्षा घेण्याचंंही काम केलंं. 
मागच्या आठवड्यात चारोळी लेखनाचंं एक सत्र झालं होतंं. 
चक्क एक इंग्रजी चारोळीही ग्रुपवर आली. 

मग चारोळीला इंग्रजीत काय म्हणतात? 

इथपासून ते 

आई मी तुला सांडगे करायला मदत करू का?

बंबात लाकडे घातली पाहिजेत.

अशीही वाक्यंं ग्रुपवर यायला लागली.

अर्थात प्रतिसाद मिळत होतेच. 

सुमारे दोन-तीन तास झाल्यावर मी आमच्या दिपालीताईंना सांगितलंं की 'आत्तापर्यंत स्फूर्तीने जीजी वाक्ये सुधारुन ग्रुपवर पोस्ट केली आहेत ती सगळी एकत्र करून परत एकदा ग्रुपवर पोस्ट करा. जेणेकरून जी मुलंं उशीरा ग्रुपवर आली आहेत त्यांना ती सगळी वाक्यंं सलग वाचल्यावर मदत होऊ शकेल. तसेच वेगळी वाक्यंं ते विचारू शकतील. तीच तीच वाक्यंं विचारली जाणार नाहीत.' 

दीपालीताईंंनी हे काम चोख केलंं.

दिवसभरात तीन-चार वेळा त्यांनी हे संकलनाचे काम केलं. 
३००-४०० वाक्यंं बहुधा आरामात झाली असतील.

दुपारच्या जेवणानंतर मात्र जरा वेग मंदावला.

Let's keep the group active.

लगेच स्फूर्तीचा msg ग्रुपवर आला. 

तिचा हा msg बघून अनघा म्हणाली, 'मला कायम असं वाटायचं की या ग्रुपवर किती जास्त msgs येतात. आज ताईचा हा msg बघून तिची एनर्जी लेव्हल किती वरची आहे हे कळलं.'

'म्हणजे काय अनघा?  नाम ही काफी है...'
मी उत्तरलो.
दुपारनंतर स्फूर्तीनंं हा खेळ जरा अजून इंटरेस्टींग केला.
'आता ग्रुपवर केवळ इंग्रजीच वाक्यंं पाठवायची. ती मी दुरुस्त करून देईल. मराठी वाक्यंं ट्रान्सलेट करून देणार नाही.'
मुलांनी हाही आदेश मानला.
मुलांकडून आता केवळ इंग्रजी वाक्यंंच येऊ लागली -
12 o'clock. Its time to watching Mahabharata. Shall I on the tv Baba?
Baba I write the couplet. please see this.
स्फूर्ती -
Good try beta.
(हे 'बेटा' संबोधन आमच्या मुलांना फारच आवडलं. लक्षात राहिलं.)
Its 12 noon Baba, time for Mahabharata. Shall I switch on the tv?
Baba, I have written a couplet. Can you have a look?
अशी 'य' वाक्यंं दुरुस्त करून दिली गेली.

दिवसभरात बोलायची वाक्यंं संपली की काय म्हणून मुलांनी तीन गोष्टी भाषांतरित केल्या. 

एक कविता भाषांतरित केली.

एका दिवसात मुलांचा आत्मविश्वास खूपच वाढल्याचंं जाणवलंं.

एकूणात काय जोरदार साजरा झाला इंग्रजी संभाषण दिन.

'स्फूर्ती खूप मनापासून धन्यवाद.'

'Hey don't be formal. I too enjoyed manapasun.'

हे वाक्य आवडलंं होत आपल्याला.
आमच्या मिलिंदरावांनी ही कामगिरी फत्ते केली होती.
त्यांनी तर काही ठिकाणी व्याकरणही समजावून सांगितलंं होतंं.

स्फूर्ती गटावर आली ती गेलीच नाही.

तिलाही दुसऱ्या दिवशीच्या कृतींची, व्रतांची उत्सुकता वाटायला लागली होती.

I feel very motivated being in this group...

स्फूर्तीनंं गटावर msg पोस्ट केला.
मुलांचं, पालकांचं भरभरून कौतुक केलं.
मुलांनाही छान वाटलं.

तोपर्यंत इकडे मला तिचा वैयक्तिक msg आला होता.
Shivraj can you make a rule for class 7? Every Wednesday they should talk in English throughout the year.
नक्कीच विचार करायला हवा.

शिवराज पिंपुडे 

पूर्व माध्यमिक - विभाग प्रमुख,

ज्ञान प्रबोधिनी, निगडी.